Namnet på det nye senteret blir Rosseland Centre for Solar Physics (RoCS). Det er oppkalla etter den store norske astronomen Svein Rosseland, som grunnla Institutt for teoretisk astrofysikk i 1934
Målet for det nye senteret er å forstå korleis vår næraste stjerne, sola, faktisk fungerer. Ved å kombinera observasjonar av sola med avansert datamodellering skal senteret utvikla ny kunnskap om partikkelakselerasjon og oppvarming både inni og rundt sola. Slik kan ein avdekkja prosessar som har direkte konsekvensar for jordatmosfæren og vilkåra for livet på jorda.
Forskingsrådet har gitt ti forskingsmiljø status som Senter for framifrå forsking (SFF). Sentera får til saman 1,5 milliardar kroner over ti år for å driva forsking på internasjonalt toppnivå.
Det nye senteret omfattar heile solfysikkgruppa ved Instiutt for teoretisk astrofysikk. Mats Carlsson leiar senteret, medan Viggo Hansteen, Boris Gudiksen, Luc Rouppe van der Voort, Sven Wedemeyer og Bart De Pontieu er såkalla principle investigators (PI) for senteret.