Årets norske sommar er uforgløymeleg med varmerekordane sine. Sola er kjelda til all energi som gjer jordkloden bueleg, så kor mykje har han bidrege til hetebølgja? For å forstå det som skjer her på jorda, må me også ta i betraktning det som skjer på vår eigen livgivande stjerne.
«Sola verkar for oss menneske som ein statisk og roleg, gul skive på himmelen», skriv solforskar Pål Brekke i boka Den stormfulle sola. Likevel har professor Sami K. Solanki, som er direktør ved Max Planck Institute og var årets Rosseland-forelesar ved UiO, vist oss at sola eigentleg er ei uroleg og varierande stjerne, ei enorm lyskjelde som påverkar klima og miljø over heile kloden.