Om prosjektet
IMPEL-prosjektet forskar på studentars motivasjon, fysikkidentitet og læring i fysikk på universitetsnivå. Vi ser på studentars utvikling av motivasjon, syn på læring og fysikkidentitet i møte med både interaktive, berekningsorienterte og meir tradisjonelle undervisningsformer. Målet er å gjera fysikkutdanning betre slik at den best muleg møter behova til både studentar og samfunnet.
Mål
Prosjektet skal bidra til betre fysikkutdanning på universitetsnivå gjennom å skaffe kunnskap om
- studentars utvikling av motivasjon, syn på læring og fysikkidentitet dei to første åra av studiet
- studentars erfaringar med interaktive og berekningsorienterte undervisningsformer i fysikk, i ein skandinavisk kontekst
- læringsassistentars erfaringar og utvikling gjennom Læringsassistentprogrammet for gruppeundervisning
- studentars erfaringar og utvikling av motivasjon i periodar med fjernundervisning grunna covid-19-pandemien
Kunnskap framskaffa i prosjektet vil informere utvikling av undervisning, læringsressursar og studieprogram i fysikk. Resultata vil bidra til at eit breidt spekter av fysikkstudentar får bruke og vidareutvikle motivasjonen sin til både å lære fysikk og å bli ein fysiker for si eiga, universitetets og samfunnets glede og nytte.
Aktivitetar og resultat
Artikkel om implementering av læringsassistentprogrammet i Europa:
Odden, Tor Ole Bigton; Lauvland, Anders; Bøe, Maria Vetleseter & Henriksen, Ellen Karoline (2023). Implementing the Learning Assistant Model in European higher education. European Journal of Physics. ISSN 0143-0807. doi: 10.1088/1361-6404/acb39e. Fulltekst i vitenarkiv
Artikkel om høgtpresterande fysikkelevar og fysikkidentitet:
Bøe, Maria Vetleseter (2023). Staying recognised as clever: high-achieving physics students' identity performances. Physics Education. ISSN 0031-9120. 58(3). doi: 10.1088/1361-6552/acbad9.
Artikkel om motivasjon for berekningsorientert biologi:
Eliassen, June Edvarda; Bøe, Maria Vetleseter; Nederbragt, Lex; Berg, Marthe Mjøen & Gregers, Tone Fredsvik (2022). Motivasjon for beregningsorientert biologi og sammenhengen med matematikk R2 fra videregående opplæring. Nordic Journal of STEM Education. ISSN 2535-4574. 4(2), s. 58–70.
Prosjektet deltok på den digitale ESERA-konferansen i august 2021:
Lauvland, A., Bøe, M. V., & Henriksen, E. K. (2021): Motivation profiles among first-year physics students. Presented at the ESERA Conference 2021, Braga, Portugal
Andre hovudrunde med datainnsamling vart gjennomført i april 2021 blant første- og andreårsstudentar i fysikk frå UiT, NTNU, NMBU, UiB og UiO. Fokusgrupper med dei same studentane frå UiO som deltok i 2020, vart gjennomført i mai og juni 2021.
Første hovudrunde med datainnsamling vart gjennomført blant førsteårsstudenter i fysikk hausten 2019 og våren 2020 ved universitetene UiT, NTNU, NMBU, UiB og UiO. Vårsemesteret 2020 vart det også samla inn fokusgruppedata blant studenter på emnet FYSMEK1110 ved UiO. Fokusgruppene vart gjennomført i januar og i mai, slik at data spenner over både normalsituasjon og fjernundervisning under koronapandemien 2020.
IMPEL gjennomførte i mai 2019 ei pilotundersøking blant studentar i emnet FYSMEK 1110. I undersøkinga vart alle studentane invitert til å svare på eit spørreskjema som måler deira motivasjon for å lære fysikk og korleis denne henger i hop med ulike former for undervisning. Data frå pilotundersøkinga vart bruka til å betre og validere instrumentet til ny datainnsamling våren 2020.
I august 2019 deltok IMPEL på konferansen ESERA 2019 (European Science Education Research Association):
Lauvland, A., Odden, T. O., Bøe, M. V., & Henriksen, E. K. (2019): Learning Assistants transformed views on teaching and the teacher role after a training programme. Presented at the ESERA Conference 2019, Bologna, Italy
Forsking på Læringsassistentprogrammet stara hausten 2018 med spørreskjemaundersøking og fokusgruppeintervju blant læringsassistentane som underviste på emne som deltek i ordninga. Våren 2020 vart datainnsamlinga utvida til også å inkludere observasjonar av gruppeundervisning i dei aktuelle emna, som var FYSMEK1110 Mekanikk, FYS2130 Svingninger og bølger og FYS2140 Kvantefysikk.
Bakgrunn
Bakgrunnen for IMPEL-prosjektet er at
- fysikkundervisning på universitetsnivå er i endring frå tradisjonelle til meir interaktive og berekningsorienterte undervisningsformer
- studentars læring og gjennomføring i fysikk er nært knytt til deira motivasjon og disiplinære identitet, men det finns lite forsking på korleis motivasjon og identitet blir utvikla i møte med interaktive og berekningsorienterte undervisningsformer
- tidligegare fagdidaktisk forsking peikar på at tradisjonell undervisning og læringskultur i fysikk ikkje klarer å møte breidda av fysikkstudentars motivasjon og identitetar
- det finns veldig lite forsking på bruk av interaktive undervisningsformer i fysikk i høgare utdanning i skandinavisk kontekst
Metodar
IMPEL nyttar både kvantitative og kvalitative forskingsmetodar. Ulike aspekt ved studentars motivasjon og syn på læring blir målt over tid ved hjelp av spørreskjema og blir analysert ved bruk av statistiske, psykometriske metodar og verkty. I tillegg undersøkast studentars erfaringar og motivasjon gjennom gjentekne kvalitative djupneintervju. Gruppelærarars erfaringar med læringsassistentprogrammet blir studert ved hjelp av spørreskjema, observasjonar og fokusgruppeintervju. Teoretiske perspektiv frå motivasjonsteori, spesielt forventning-verdi-teori og sjølvbestemmelsesteori, blir bruka for å analysere og tolke data. Vi brukar også perspektiv frå forsking på science identities eller fysikkdidentitet.
Samarbeid
IMPEL blir leia frå Seksjon for fysikkdidaktikk og samarbeider med CCSE - Centre for Computing in Science Education. Spesielt er IMPEL involvert i forsking knytt til Læringsassistentprogrammet ved UiO, som blir leia av førsteamanuensis Tor Ole Odden ved CCSE. IMPEL samarbeider med aktuelle institutt ved følgande universitet: Norges arktiske universitet UiT, Norges teknisk-naturvitenskapelige universitet NTNU, Norges miljø- og biovitenskapelige universitet NMBU og Universitetet i Bergen UiB.